تاج حالة ونس

الاول ، احب اشكر عبد الرحمن علي تشجيع الجميع علي الكتابه و هي الطريقه اللي نجحت فعلا ، حتي انا غصبت علي نفسي رغم الارهاق الساحق اللي انا عايشه ، و قررت اقبل التاج و اكتب
و هذه هي ردودي علي التاج


آخر فيلم شفته
احب اذكر اخر فيلم استمتعت بيه ، و هو عمارة يعقوبيان

آخر كتاب قرأته
انا مقل في القراءه لضيق الوقت ، لكن اخر كتاب كان "شكلها باظت" لعمر طاهر و هو البوم اجتماعي مصري ساخر ، و حاليا اقرا كتاب مستعار من الاخ ايمن قاسم هو"أسماء مستعاره" لعبد الرحمن منيف

آخر حد استفزك ... وليه

عماد الدين اديب و هو بيتكلم عن حسني مبارك في حلقة الامس من العاشره مساءا
آخر مرة فكرت فيها في الموت
بافكر فيه كل يوم ، لكن اخر مره فكرت فيه بفزع و احساس اني حاموت ، كان في رمضان اللي فات ، لاني كنت مصاب باحتقان في الزور وصل لمرحلة اني صحيت من النوم في حالة اختناق

أكتر مرة حسيت انك ندل .. لامؤاخذة يعني

من كام يوم حسيت باني ندل تجاه الصديق احمد عزام ، لانه مرر لي تاج الخمس فضايح الشهير في مجموعة الفاجومي و قد قمت بكتابة خمس فضايح حقيقيه فعلا ، لكني استندلت و لم انشرها لاني اعدت قراءتها و شعرت انها غير قابلة للنشر
كاتب مقال لا يفوتك ما يكتبه
احاول الا يفوتني مقال فهمي هويدي الاسبوعي ، رغم اختلافي مع معظم ما يكتب ، لكن يعجبني طريقته في التفكير و الكتابه ، كما لا يفوتني رساله او مدونه للصديق محمد هاشم لانني معجب بكتاباته فعلا

أكتر ممثلة بتشوف ان شكلها ينفع مصر ...بشرط متكونش رقاصة طبعاً :)
كانت و مازالت سعاد حسني

أكتر أغنية بتحبها لمنير
ده اصعب سؤال ، لاني كما كتبت من قبل عن منير ، من الصعب ان اختار اغنيه معينه لانه مطربي المفضل و كل البوماته لها معي ذكريات كبيره ، لكن لو اخترت الان ساقول ، بره الشبابيك

أكتر آية في القران بتلمس قلبك
بسم الله الرحمن الرحيم " فمن كان يرجو لقاء ربه فليعمل عملا صالحا ولا يشرك بعبادة ربه احدا" الكهف


ضيف على الفضائيات مبتطيقش تشوف خلقته
كتير بالطبع ، لكن اكتر اتنين هما فيفي عبده و الشيخ سيد حمدي بتاع الاحلام

كتاب تنصح بتدريسه لطلبة إعدادي ... معرفش اشمعنى إعدادي
شخصية مصر

بيت شعر مبيروحش من بالك
والمشي طاب لي
و الدق علي طبلي
ناس كانوا قبلي قالو في الامثال
الرجل تدب مطرح ما تحب
و انا صنعتي مسحراتي في البلد جوال
حبيت و لفيت ، و كل شبر و حته من بلدي، حته من كبدي حته من موال


نوع عربية هتموت وتركبها
بي ام دبليوموديل السنه دي

بلد بتحبها وتكره ناسها ... تكون زرتها طبعاً :)ـ
للاسف ما زرتش بلاد كتير ، لكن زرت مدن كتير ، لكن انا باحب اسوان و بورسعيد رغم اني ماليش علاقات مع ناس من اهلها


مدونة لازم تفوت عليها أول ما تدخل نت
الوعي المصري ، وائل عباس

مشهد من فيلم مبتنساهوش
كتير ، انا باعتبر نفسي شخص سينمائي ، علي سبيل المثال ، مشهد المحاكمه في فيلم صلاح الدين ، مشهد المنولوج الطويل لآل باتشينوفي فيلم devil advocator
كمان مشهد اللقاء الاول بين نجيب الريحاني و سليمان نجيب في غزل البنات

مسرحية مهما اتفرجت عليها بتضحك حتى وانت عارف اللي هيتقال !؟
العيال كبرت

ايه رأيك في المظاهرات ؟
بنت حلال

بتسمع أغاني شعبية أحياناً ؟ ولمين
عدويه ، و محمد رشدي و حكيم و ياسين التهامي

قاريء القران اللي بتفضل سماعه
انا من عشاق الخمسه الكبار ، الشيخ مصطفي اسماعيل و الشيخ عبد الباسط ، و الشيخ محمد صديق المنشاوي و الشيخ محمود علي البنا و الشيخ الحصري
و اضيف ليهم في التجويد الشيخ الطبلاوي و في الترتيل الشيخ جبريل ، اما الشيخ رفعت فهو خارج المنافسه


حد مشهور نفسك- أو كان نفسك لو مات- تقابله وتتكلم معاه
لاني كنت محظوظ و قابلت و اتكلمت مع عم نجيب محفوظ ، يبقي كان نفسي اقابل و اتكلم مع عم صلاح جاهين


تحياتي لكل اللي استلموا التاج و قالوا حاجات جميله ، و تحياتي ليك يا عبد الرحمن
و اسمحوا لي ادعو اخانا طارق المملوك لحمل التاج